Isa ka balo nga babae ang nanumbag ug nanagpa sa miresponde nga mga babaeng barangay officials human kini gibadlong sa gihimong pag-wild diha sa Purok 8, Brgy. La Union, Cabadbaran City pasado alas – 8:30 kagabii.
Ang suspetsado nailang si Maricar Atega, 35 anyos, balo, residente sa Purok 8, Brgy. Mabini samtang ang mga biktimang barangay kagawad mao sila Kag. Arlene Exaure Umba ad, 50 anyos, minyo ug Kag. Nelita Exaure Cempron, 69 anyos, minyo, pulos residente sa Brgy. La Union sakop sa maong siyudad.
Sumala ni Police Lieutenant Colonel Renel Serrano, ang hepe sa Cabadbaran City Police Station, nag-away matod pa ang suspetsado ug ang uyab hinungdan sa pag-wild sa nauwahi.
Daling gibadlong sa mga biktima ang nauwahi, apan sila maoy gipahimungtan sa kasuko.Nasumbagan sa tuong mata si Umba ad samtang nasagpaan sa tuong nawong si Cempron.
Sa hitabo, gidakop sa pulis ang responsable ug atubangon ang kasong Direct Assault.
