NAKABALIK dayon ang tanang pasyente sa Davao de Oro Provincial Hospital-Maragusan human nga walay gika-report nga damyos sa gihimong inisyal nga assessment human sa pagtay-og sa magnitude 5.9 nga linog kagahapon sa alas-2:58 sa kadlawon.
Hinoon nakaandam na ang mga tents sa gawas sa ospital aron nga dunay magamit kung ugaling dunay aftershocks.
Sa nahitabo, dali hinoon nga naka-respondi ang mga personahe sa Provincial Disaster Risk Reduction and Management Office (PDRRMO) ug Municipal Disaster Risk Reduction (MDRR)-Montevista ngadto sa Montevista Provincial Hospital aron e check ang maong building facility ug nasuta nga walay expansion of cracks nga nahitabo hinungdan nga gi-abisohan ang mga pasyente nga mamahimo na silang mubalik sulod sa mga rooms.
Nagpadayon sab ang gihimong assessment sa mga munisipyo ug sa mga Provincial hospitals sa probinsya.
Samtang, gumikan sa pagtay-og dunay pipila ka mga grocery store ang nagkatag ang mga paninda sa salog sa Maragusan.
Sayo sab sa buntag nga nagpahigayon ang mga personahe sa City Disaster Risk Reduction and Management Office og inspeksiyon sa mga gambalay ug mga eskwelahan aron nga masayran kung duna bay nanagdaut.
Gideklara hinoon sa Mati-CDRRMO nga luwas ang mga establishemento human sa pagtay-og.
Wala say gikatalang namatay o nasamdan atol sa linog samtang lauman pa ang mga aftershocks.
