LEGAZPI CITY – Pigklaro kan Albay Provincial Administrator na ekslusibo para sa mga empleyado kan kapitolyo an bubuksan asin ibinugtak na wellness center.
Sa intrevista kan Brigada News FM Legazpi kay Provincial Administrator Shiena Onrubia-Dela Cruz, sinabi niya na obheto kaining gibuhon na accessible an mga serbisyong pansalud para sa mga empleyado kan kapitolyo.
Pagkaklaro niya, dai ini bukas para sa publiko na gusto sana magpa-check-up, alagad segun saiya, kun nataon na igwa nin mga tawo sa kapitolyo na bako empleyado o kaya sarong kliyente asin kinakaipuhan nin urgent na serbisyo, iaakomodar man sinda sa nasambit na clinic.
Mientrastanto, apwera sa health services, abilable man digdi an mental health services na magigin accessible para sa mga nangangaipuhan.
Segun pa saiya, an nasambit na clinic, nakatalaan nang buksan sa maabot na bulan kan Disyembre ngunyan na taon.
