LEGAZPI CITY – Nagsimula nang makatanggap ng supply ng mga bakuna ang Albay Provincial Health Office mula sa Department of Health Bicol nito lamang nakaraang linggo.
Ito ay kinumpirma ni Provincial National Immunization Program Coordinator Mark Gumba kasunod ng mga pagpupulong kamakailan kasama ang DOH, consultant ng World Health Organization na si Dr. Tadesse Birru, at mga kinatawan ng Department of Education Albay Schools Division bilang paghahanda para sa pagpapatuloy ng School-based Immunization drive.
Upang ibigay sa panahon ng regular na pagbabakuna, ang PHO ay tumanggap ng tigdas, beke, at rubella, at Inactivated Polio Vaccine kung saan nakatakda itong ibigay sa mga batang isang taong gulang pababa at Pneumococcal Vaccine naman para sa mga senior citizen.
Ayon kay Gumba, ito ay nakabase sa regular na programa alinsunod sa Department Memorandum Order 2024-0250. Naghahanda na ngayon para sa Routine Immunization Delivery and Strategy ang Provincial Health Office, sa pakikipagtulungan sa Primary Healthcare Unit ng bawat lokal na pamahalaan ng lalawigan upang paigtingin pa ang saklaw at pagsisikap ng pagbabakuna sa Albay.
