LEGAZPI CITY – Nagsagibo nin sarong pagtiripon an Albay Provincial Health Office (PHO) kasuhapon, Hulyo 8, 2024, para pag-orolayan an Referral System sa probinsya kan Albay.
Presente sa nasambit na pag-orolay an mga opisyal kan Provincial Department of Health Office, Bicol Regional Hospital and Medical Center (BRHMC), Pronvincial Government of Albay (PGA) managed hospitals, Rural Health Units, City Health Offices kan Albay, asin Legazpi City Hospital.
Obheto kan nasambit na aktibidad iyo an pag-orolayan an problema asin mapakarhay an serbisyo pag-abot sa sistema kan referral sa probinsya. Segun sa PHO, an siring subuot na aktibidad sarong kapaagihan para magtarabangan an mga stakeholders sa probinsya.
Mientras, ipighayag man kan nasambit na opisina na nagpapadagos subuot an saindang Medical asin Dental Mission sa probinsya. Kasuhapon, nagsagibo nin siring na aktibidad an PHO sa La Medalla, Pioduran, Albay sa pakikipagtabangan man sa Brgy. Council.
Matrayumpo subuot an opisinang nakapagkondusir nin medical check-up, dental check-up asin extraction, asin family planning. Nakapanao man subuot sinda nin mga medisina, vitamins, hygiene soaps, asin family planning commodites.
