KALIBO, AKLAN—Nakalista it panibag-ong kaso it Delta variant do probinsya it Aklan dahilan agud sumaka eon sa makarun do kaso sa 22 cases it nasambit nga mas makataeapon nga variant it COVID-19.
Raya hay sangka returning overseas Filipino worker (ROF) base sa ginpaguwa nga resulta it University of the Philippines-Philippine Genome Center (UP-PGC) kahapon, Agosto 29,2021.
Sa ginpatigayon nga online Talakayan with DOH ag PIA 6, ginpahayag ni Dr. Bea Camille Fillaro-Natalaray, DOH Medical Officer lll nga nakalista it 43 nga kadungan nga kaso it Delta, Theta, Beta ag Alpha variant cases sa rehiyon maghalin sa swab samples nga nakolekta humalin ku ulihi nga dominggo it July ag first week it August.
Do sa 17 nga Delta cases, tag ap-at kara hay halin sa Negros Occidental, Bacolod City ag Iloilo Province, sambilog nga local case nga taga-Iloilo City ag sambilog man nga kaso sa Capiz apang raya hay subject pa sa verification, ag do daywang ROF’s nga halin sa probinsya it Iloilo ag sambilog sa Aklan.
Mag-eowas kara, sa pinakaulihi man nga batch it specimen hay nakalista it tatlong local cases it Beta variant sa Iloilo, Negros Occidental ag Bacolod City kamana man may daywang ROFs nga natukiban man sa Iloilo province.
Sa bahin man it Alpha variant, daywang local cases do nailista sa Iloilo province ag sambilog hay ROF halin sa Negros Occidental samtang do Bacolod City hay may nailista man nga kadungan nga 19 nga Theta (P.3) cases, Negros Occidental nga may waeong kaso ag Iloilo City nga may sambilog.
Sa pihak nga parte, do probinsya sa makarun it Aklan hay nagapabilin sa “moderate risk” category apang nabutang sa idaeom it COVID019 alert level apisar nga naganaba eon do kaso it virus ku mga nagtaliwan nga domingo. // SHERRY ANNE REUNIR-VIDAL
