Ro Aklan ro naga isaeahanon nga probinsya sa bilog nga nasyun nga nagsabat sa hangkat nga isumite ro Provincial Child Development Center (PCDC) bilang pilot area para sa Safe School Reopening.
Raya hay matapos aprubahan it Department of Education ro pag-extend it face-to-face learning sa mga unga nga may edad 3-4yo sa selected nga mga Child Development Centers sa nasyun.
Ku buean it Hunyo, ginbisita it Early Childhood Care and Development Council ro probinsya it Aklan kaeakip ro mga representante it Provincial Social Welfare and Development Office (PSWDO-Aklan) ag inaprubahan ro pagiging haum it Aklan PCDC nga magbukas it serbisyo sa mga unga.
Mabahoe ro pagpati it provincial government sa balor it pre-primary education sa social, intellectual ag emotional development it mga unga.
Bangud kara, gintinguha nga makatao it safe learning environment para sa mga unga nga naga edad 3-4yo sa idaeum it “new normal”. / ANN DESLENE SALAZAR
