SIGURADONG moduso og resolution alang sa pagpaabot og pahasubo ang Sangguniang Panlungsod sa General Santos City alang sa pamilya sa kanhi pangulo sa nasud nga namatay nga si Fidel V. Ramos.
Sumala kay Sangguniang Panlungsod Secretary Rosalinda Mondido naandan na sa konseho sukad kaniadto nga magduso gayod og resolution alang sa pahasubo kon may mga opisyal nga namatay ilabi na sa kanhi pangulo.
Gidugang ni Mondido nga ang resolution ilaha gayod ipadala sa pamilya Ramos kon mahuman na sa konseho kay ilaha pa nga unahon ang paghan-ay sa ilang Internal Rules of Procedure kon IRP nga maoy basihan sa conduct sa mga miyembro sa ika-20 nga konseho.
Sumala usab kay Executive Assistant IV to the Vice Mayors Office Elton Padilla nga angay gayod magpasalamat ang taga Gensan kay FVR gumikan daghan usab kini og maayong nahimo sa syudad sama sa proklamasyon sa mga kanhi ransohan nga nagamit na sa taga Gensan.
Sama sa 39.2 FVR Village sa Fatima nga daghan na ang katawhan nga namuyo,Gensan Airport ug uban pang proklamasyon alang sa resettlement area sa syudad. I Ver Diazon
