Gina patihan nga nakaguwa eon sa Aklan ru gina kabig nga “person of interest” nga sangka security guard nga ulihing kaibahan ru biktima nga pawnshop manager bago makit-ang patay ag naga paligos sa sariling dugo kahapon it agahon sa parte it Mabini St. Poblacion, Kalibo, Aklan.
Gin kilaea ru nasambit nga security guard nga si Mark Archie Torrefiel, 31 anyos ag residente it Brgy. Cajilo, Makato, Aklan kunsiin base sa impormasyon nga nakaeap it Kalibo Municipal Police Station nga si SG Torrefiel ag live-in partner hay sumakay sa barko sa Caticlan ku gabie pa eamang it June 5, 2022.
Naga guwa sa imbestigasyon it mga pulis, nalikawan ru biktimang si Bonna Hercia Ambay sa nasambit nga branch kaibahan ru security guard kunsiin sa naunang nakaeap nga CCTV footage it mga kapulisan, pasado alas-singko y media it hapon ku Hunyo 5, 2022 si Torrefiel hay naga-isahanon nga nag halin eon sa nasambit nga establishmento, sumakay sa tricycle.
Gina dudahan sa bitbit ru service firearms nga .38 revolver nga gin apanag-iyahan it security agency matapos nga uwa it na-recover nga service firearms sa crime scene.
Sa gin himo nga follow-up investigation it mga kapulisan, ru nasambit nga service firearms hay nabuoe sa gina uli-an nga panimaeay nga nakatago sa idaeom it puno’t saging.
Samtang, naga padayon pa ru operasyon it mga pulis agud madakpan ru responsable sa pagkamatay it 23 anyos nga biktima ag matukoy ru motibo sa likod it krimen.
Sa makaron, presenting sa sangka funeral homes eon ru bnagkay it biktima agud ipa idaeom sa autopsy examination.//SHERRY ANNE REUNIR-VIDAL
