Nilinaw ng Philippine Medical Association (PMA) na wala silang inilabas na pahayag o sinabi kahapon na mayroon nang kaso ng Omicron subvariant ng covid-19 sa Batangas.
Sa panayam ng Brigada NewsFM Batangas, mariing iginiit ni PMA President Dr. Benito Atienza na wala silang kakayahan at karapatan na maglabas ng impormasyon hinggil sa mga variant ng covid-19 na nadedetect sa bansa.
Aniya, ang Department of Health (DOH) lamang maging ang Research Institute for Tropical Medicine (RITM) ang pupwede at otorisadong magbigay ng impormasyon ukol sa covid-19 variants.
Binigyang diin ni Atienza na ang tangi lamang naman nyang sinabi sa naturang panayam sa Laging Handa Public Briefing, ay may dalawang bagong kaso ng covid-19 ang naitala sa ilang ospital sa Batangas.
Nagpaalala lamang aniya siya na kailangan pa ring mag-ingat dahil sa bagong subvariant ng Omicron.
Sa katunayan aniya ay nakipag-ugnayan na rin sa kanila ang Provincial Health Office ng Batangas para linawin ang naturang isyu.
Una na ito ay mariing pinabulaanan kahapon ng DOH-Calabarzon na walang kaso ng Omicron subvariant sa Batangas maging sa buong Region 4A.(CLAY MARQUEZ)
#
