Gintawag it Aklan Police Provincial Office nga “generally peaceful” ro katatapos nga eleksyon sa probinsya it Aklan.
Raya hay bangud owa man it nailistang major crime ag zero related election incidents sa bilog nga probinsya.
Owa it eabot sa 25 gun ban ag an-um nga liquor ban violators nga gin-file eon sa korte, owa man it nailistang makaalarma nga insidente.
Base sa Aklan PNP, ro manami nga resulta hay bangud sa pagbueoligan it komunidad ag iba pang law enforcement agencies sa pagpatuman it tampad, malimpyo ag matawhay nga eleksyon.
Suno kay PCOL Crisaleo Tolentino, Provincial Director it Aklan, ro massive deployment it mga tawuhan it PNP sa tanan nga election-areas ro nagpugong sa mga kriminalidad ag pag eapas sa Comelec Rules and Regulations.
Matandaan nga masobra 1,000 personnel ro gin-deploy sa 17 ka munisipalidad para maserbihan ag mabantayan ro mga polling places.
Sa pihak kara, ginmanduan gihapon ni PCOL Tolentino ro tanan nga police unit nga magpabilin nga naka high alert hasta sa matapos ro election period. / ANN DESLENE SALAZAR
