Pipila ka mga establisemento ug indibidwal ang nasapon nga nakalapas sa curfew hours atol sa monitoring ug enforcement sa Regulatory Compliance Board (RCB) sa mga gabayan alang sa curfew hours ug drinking in public places nga padayong gipatuman sa syudad ilawom sa Alert Level 2.
Gi-isyuhan sila og ordinance violation receipt sa mga personahi sa RCB ug mahimong silotan tungod sa maong kalapasan.
Sa kasamtangan, ang curfew sa dakbayan magsugod sa alas 11:00 sa gabii paingon sa alas 4:00 sa buntag diin gidili gihapon ang pag-inom sa mga ilimnong makahubog sa mga kadalanan ug pampublikong lugar.
Magpadayon ilawom sa Alert Level 2 ang dakbayan hangtod sa Disyembre 15 ning tuig ug ang hugot nga pagpatuman sa mga gabayan aron masiguro ang padayon nga pagkunhod sa kaso sa Covid-19. -END- (Claudine)
