Kulong sa makaron ru 1 sa 3 suspek mga pumatay sa tricycle driver nga si Wilfredo Tamayo, Jr., nga gin abandona sa kilid it karsadahon sa Sitio Looban Brgy. Camanci Norte, Numancia, Aklan.
Sa pahayag ni PSSgt. Felizardo Navarra, imbistigador it Numancia Municipal Police Station sa BRIGADA News FM Kalibo, nakilaea ru suspek nga si alyas JR, sa legal nga edad at residente it Naic, Cavite samtang, presenting naga estar sa anang tiya sa Brgy.Bulwang, Numancia.
Na aresto ru suspek matapos maghimo it hot pursuit operation ru Numancia MPS.
Suno kay alyas JR, gin sampit eamang sigun imaw it 2 mga kabarkada para mag buoe it kaeabasa sa Brgy. Camanci Norte, Numancia.
Gin arkela sigun it mga suspek ru biktima apang pag-abot sa lugar, uwa it may maibayad nga kwarta rason nga may pilang besis nga gin buno sa kilid ag ibang parte it kaeawasan it biktima ag inaywanan sa lugar.
Nahimo pa sigun nga lumiksi ru biktima sa tricycle ag nag ampo sa mga suspek apang padayon gihapon nga gin binuno hasta nga namatay.
Naka angkon it patal nga tama’t pagbuno sa kilid nga eawas ag ibang parte it kaeawasan ru biktima dahilan it pagkamatay.
Dugang pa ni alyas JR, naka lingkod imaw sa prente it tricycle , 1 man nga suspek ru backrider ag 1 man sa likod nga parte it tricycle.
Gin daea it mga suspek ru tricycle ag dayon gin abandona sa Sitio Pigado, Brgy. Bachao Sur, Kalibo.
Gin preparer eon it mga kapulisan ru kasong murder kay alyas JR samtang gina usoy pa it mga kapulisan ru 2 mga suspek nga naka paeagyo.//MARIVIC Y. ILIN
