CAMARINES NORTE- Umabot sa kabuuang bilang na 14, 611 ang bilang mga nabakunahan sa lalawigan ng Camarines Norte sa unang araw ng pambansang bakunahan.
Ayon ito kay acting Provincial Health Officer Dr. Arnel Francisco sa maikling mensahe sa Brigada News FM Daet.
Hindi pa nakakapagpalabas ng datos ang PHO para sa ikalawang araw ng bakunahan.
Tulad kasi noong unang araw ay inaabot ng gabi ang pagbabakuna lalo na dito sa bayan ng Daet.
Dagsa rin ang mga tao sa iba’t- iba pang vaccination site at sa katunayan ay mayroong lugar na nagsisimula pa ng alas 2 ng madaling araw ang pila para lang magpabakuna.
Sa isang media interview sinabi ni Francisco na bagamat naging maayos ang distribusyon nila ng vaccinators ay may mga lugar na kinulang ng bakunang Pfizer na ituturok sa pediatric population.
Sa kabila nito nagpasalamat ang opisyal sa naging tugon ng mga taga Camarines Norte sa panawagang magpabakuna.
Matatandaan na isa ang bayan ng Basud, sa nagkulang agad ng bakunang Pfizer kaya’t sa pag arangkada pa lamang ng pagbabakuna sa unang araw ay maraming kabataan na ang hindi nabakunahan.
