MIAPELA ang usa ka doktor sa GenSan ngadto sa mga ginikanan nga protektahan ang mga anak batok COVID-19.
Matud ni Dr. Fidel Peñamante, Presidente sa Philippine Medical Association (PMA) GenSan- chapter base sa obserbasyon nila sa mga natala nga kaso sa COVID-19 sa dakbayan niini nga ubay- ubay ang mga bata.
Kini ang hinungdan nga nanawagan kini sa mga ginikanan nga likayan usa ang pagdala sa mga bata sa mall o uban pang pampublikong lugar. Ang mga bata ang dili mapugos nga masuot og facemask hinungdan nga dako ang posibilidad nga matakboyan sa virus.
Dugang ni Peñamante, mas mag-doble ang amping sa tanan tungod sa pagkatala sa kaso sa bag-ong variants sa COVID-19 nga mao ang Omicron. Samtang ang Malakanyang ang nanawagan sa mga LGUs nga pahugtan ang seguridad batok sa nasangpit nga bag-ong variants. Sa ulahing datus sa LGU- GenSan, naa na lang sa 82 ang aktibong kaso sa virus gikan sa liboan nga kaso nakalabay’ng mga bulan. (Richel Gubalani)
