LEGAZPI-Naiuli na sa Barangay Tuburan Ligao City sa Albay an hawak ni Police Corporal Christian Del Valle, saro sa 2 pulis na binadil gadan sa syudad kan Naga.
Sa pinadarang mensahe kan pamilya kaini sa Brigada News Fm Legazpi, dae pa ninda maako hasta sa ngunyan an pagkagadan kan saindang mahal sa buhay.
Apwera sa saradit pa an duwang aki kaini na sarong 3 anyos asin 3 bulan pa sana, limang bulan pa sana man ining nadestino sa syudad kan Naga makalihis an assignemnet sa Probinsya kan Masbate.
Si Del Valle man su boot an nasa 7 taon pa sana man sa serbisyo asin sarong marhay, matinabang na tawo.
Dae man sa ngunyan maako kan kapamilya na an pagkagadan kaini iyo su boot an huli sa warang kamugtakan na tawo.
Kun marurumduman, apwera kay Del Valle kaiba sa nagadan man si Police Master Sergeant Romeo B. Padua kan Police Station 1.
Tulos man na nagadan an 33 anyos na suspek na si Jerico Cano, na kabale sa drug watchlist asin luwas laog naman sa kulungan makalihis na makipagbadilan sa mga otoridad.
