Andam ang City Schools Division sa Cagayan de Oro ugaling malakip sa listahan ang gisugyot nila nga tunghaan sa syudad sa ipatuman nga pilot face-to-face classes.
Sigun ni Assistant Schools Division Superintendent Dr. Alicia E. Anghay nga nagpa-abot sila karon kung malakip ba ang Batinay Elementary School sa brgy. Tagpangi ning syudad.
Dili pasab makasiguro ang division nga malakip ang maong tunghaan tungod pabiling gipa-ilawom ang Cagayan de Oro sa Modified Enhanced Community Quarantine.
Una nang gipasabot ni Dr. Anghay nga daghan ang ilang gikonsidera sa pagsugyot sa maong eskwelahan nga anaa nahimutang sa hilit nga lugar sa syudad diin kaniadto zero cases kini sa COVID-19.
Kahibaloan nga karong adlawa ang pag-sapinal sa Department of Education sa listahan sa 100 ka mga public schools nga molambigit sa pilot face-to-face classes.
