MAS madumalahan na ang pagpanghatag og ayuda alang sa mga maapektohan sa lockdown kung kini granular na lang ug dili sa tibuok GenSan.
Kini ang panglantaw ni Rebecca Magante, labaw sa City Social Welfare and Development Office kun CSWD human ang kasinatian sa unang pagpanghatag og Special Amelioration Program kun SAP sa mga lugar nga gipailalom sa ECQ sama sa GenSan kaniadtong 2020.
Ang maong kasinatian matud ni Magante sa massive distribution ug limitadong face to face tungod sa COVID-19 ang maoy makatabang kanila sa mga umaabot nga aid distribution nga mahimong hapsay ug nakasunod sa takdang adlaw ug natuman ang mga patakaran sa COA.
Nasayran nga sa COA information, giangkon ni Magante nga nadelatar gyud sila sa pagpang-apod apod sa SAP tungod sa kadaghan nga ilang gihatagan gikan sa pondo nga mokabat sa P566,150,000.00.
Gipang apod apod kini sa sobra 108-K plus ka household human ang house to house validation sa limitadong panahon.
Hinuon bisan niini giangkon ni Magante nga nahatagan usab ang tanan ug may nabalik pa nga mokabat sa P16 million tungod sa uban nga nadoble apan ilaha usab gibalik.
