Mokabat na sa 23 ka mga batan-on nga edad 13-hangtud 16-anyos ang na-rescue sa mga sakop sa Mati City Public Safety ug Mati City Police nga nalambigit sa gakahitabong riot sa syudad.
Subay sa impormasyon gikan sa Mati City Information Office, gikan bulan sa Hulyo karong tuiga ubay-ubay na ka riot incidents ang narespondihan sa otoridad.
Pinakaulahi niini nahitabo sa Sudlon Riverside, Barangay Central Mati City kung asa ubay-ubay ka menor de edad ang nareskyu ug nakuhaan og mga hinagiban sama sa mga sumpak, kutsilyo, screw driver ug uban pa.
Tungod niini miapela ang kapulisan ngadto sa mga ginikanan nga imonitor ang aktibidad sa ilang mga anak nga posible unyang malambigit sa kagubot ug mao unya ang hinungdan nga mabutang sa peligro ang kinabuhi.
Gawas niini, pahinumdum sa otoridad ang gipatuman nga curfew sa syudad. BNFM-DAVAO
