WALA pa’y kasong gipasaka ang otoridad batok sa negosyanteng Chinese national nga gitudlong tag-iya sa gituohang shabu lab.
Kini human sa hapit na duha kabulan gikan sa operasyon atong Agosto 04, 2024 sa Barangay Pinol, Maitum, Sarangani Province kung asa gituohan sa otoridad nga ang warehouse tunga sa bukirong bahin sa maong barangay ang gihimong shabu laboratory.
Sumala kang Police Col. Deanry Francisco, director sa Sarangani Provincial Police Office (SPPO) wala pa’y kasong napasaka batok sa Chinese national nga negosyanteng taga- GenSan tungod wala pay ubang dokumento sama sa sertipikasyon gikan sa Philippine Drug Enforcement Agency (PDEA) 12 nga nagpamatuod nga kini gamit sa paggama og iligal nga droga partikular shabu.
Luyo niini, naglaom si Francisco nga mapasaka na ang kaso batok sa langyaw ug ubang mga kauban niini.
Subling gibarugan sa opisyal nga ang mga nakumpiskang milyon ka pesos kantidad sa ekepo ang gamiton sa paghimo og shabu.| RICHEL GUBALANI
