NAKITA sa Sarangani bay ang usa ka leatherback sea turtle nga giilang world largest turtle species.
Sa impormasyon sa Sarangani Bay Protected Seascape (SBPS) kini ang unang higayon nga nakita kini nga nangitloy sa baybayon sa Barangay Luma sa Kiamba, Sarangani Province atong Martes sa gabii.
Base sa taho sa Community Environment and Natural Resources Office (CENRO) sa Kiamba, ang reptile ang gilayong gibalik sa dagat human nangitlog og 96 kabuok.
Butyag ni Darwin Diso ug Eugene Dave Batadlan, residente sa lugar nakita nila kini alas-10 sa gabii Martes ug giluwas nila ang mga itlog sa pawikan. Kini aron masigurong luwas ang mga itlog gikan sa posibleng bahad sa kinabuhi tungod nag-high tide sa nesting site.
Giila ang mahinungdanon nga ‘role’ sa pawikan sa marine ecosystem rason sa pagpahigayon og awareness sa environmental department sa komunidad. Una nang, gibutyag ni Atty. Felix Alicer, regional executive director (RED) sa DENR-12, angayang magtinabangay ang komunidad ug mga taga gobyerno masiguro ang conservation sa marine wildlife species. I Richel Gubalani
