Mugnaon sa Davao City Police Office ang usa ka Special Investigation Task Group kon SITG aronmaoy mututok sa pagpatay sa magtiayong Atty. Sitti Gilda Mahinay-Sapie ug Muhaimin Mohammad Sapie sa miaging semana.
Sumala kang Police Col. Kirby John Kraft, DCPO City Director, ang SITG langkuban sa Davao City Police Office, Criminal Investigation and Detection Group (CIDG) ug Regional Crime Laboratory Office-XI.
Ang SITG dunay himoon nga “weekly assessment” aron kumustahon ang kalambuan sa kaso aron masakmit ang hustisya sa kamatayon sa magtiayon ilabi na sa ilang nahabilin nga mga anak.
Gidugang ni Kraft nga andam mohatag og seguridad ang kapulisan sa nabiling myembro pamilyang Sapie samtang wala pa natumbok kung si kinsa ang nagpaluyo sa krimen.
Aron usab mapaspasan ang ginahimong imbistigasyon, giawhag sa opisyal ang mga tawo sa Phase 2 Solariega Subdivision nga dunay kasayuran sa hitabo nga motabang pinaagi sa pagbutyag sa nahibal-an.
Kahibaluang duna nay mga ebidensya nga nakuha gikan sa crime scene sama sa basiyo sa bala ang gipailawum na sa eksaminasyon samtang gisubay na sa mga imbistigador ang mga tawo sa palibot sa posiblieng impormasyon nga ilang gihuptan. Sa karon giplastar pa sa pamilya ang paglubong kang Atty. Sapie samtang ginahulat nga moabot ang laing anak niini.BNFM-DAVAO
