Nagtungo sa tanggapan ng Commission on Elections (COMELEC) sa Palacio de Governador sa Maynila ngayong umaga si dating Caloocan rep. Edgar Erice.
Ito ay para ipakita ang natanggap niyang mga dokumento na ‘di umano’y nagpapatunay na mayroong lagay na natanggap ang isang COMELEC official.
Sa kaniyang ebidensyang hawak – nakalagay dito ang umano’y 14 na Bahamas offshore bank accounts na nag-uugnay sa Miru Systems, ang napiling supplier ng COMELEC para sa darating na halalan.
Sabi ni Erice – dapat ay i-review ni poll body chief Garcia ang naturang mga dokumento lalo na’t maaapektuhan nito ang integridad ng papalapit na eleksyon.
Bago ito – una nang sinabi ni Garcia na handa siyang maimbestigahan para matukoy ang katotohanan sa naturang mga alegasyon.
Mayroon na rin siyang inilabas na waiver para ma-check ang kaniyang mga ari-arian ng NBI at ng AMLC.
