Pinasalamatan ni Foreign Affairs Secretary Teodoro Locsin Jr. ang Estados Unidos dahil sa pagbabahagi nito ng kanilang sobra na COVID-19 vaccines sa mga bansa na nakararanas ng kakulangan sa suplay.
Sinabi ni Locsin sa kaniyang ombnibus intervention sa Special ASEAN-US Foreign Ministers’ meeting na nakarinig na siya dati ng paghingi ng tawad ng US dahil sa over-ordering nito ng mga bakuna.
Gayunman, sinabi ng kalihim na nagpapasalamat pa rin siya sa Amerika para rito.
Ipinunto ni Locsin na kung hindi sumobra ang na-order na bakuna ng US ay wala sana itong maibibigay na sobrang suplay sa ibang mga gobyerno na hindi sapat ang nabili o walang kakayahan na bumili.
Ayon sa US, kaya nitong magbahagi ng 16-million shots sa Pilipinas sa pamamagitan ng COVAX Facility.
Nitong July naman ay inanunsyo ni vaccine czar Carlito Galvez Jr. na makakatanggap ang Pilipinas ng mahigit 3-million doses ng Johnson & Johnson vaccines mula sa donasyon ng US.
