LEGAZPI CITY – Pigpaplano kan Legazpi City Health Office (CHO) na magbugtak ki sarong dengue fast lane sa mga nagpapakonsulta para sa nasambit na helang.
Segun kay CHO head Dr. Fulbert Gillego, ipapautob an pagbugtak kaini sa baba kan opisina tanganing maprayoridad an mga mapakonsulta kun igwa nin mga sintomas nin dengue asin nganing maaraman tulos kun positibo sa dengue.
Dakulang bagay su boot ini tanganing maagapan asin dai na magdakol pa an mga kaso nin dengue.
Liwat na pinapagiromdom kan opisina na manteniron an pagigin malinig sa harong, lalo na an mga parte na pwedeng istaran kan mga lamok na nagdadara ki dengue.
Apwera kaini, ugalion an 4 o’clock habit sa kada barangay lalo na ngunyan na naglaog na an tag-uran sa nasyon.
