Ginahueat pa it Malinao MPS ro post mortem result sa biktima nga si Sherwin Retiro nga ginbuno-patay sa barangay hall it Bulabod, Malinao agud masayran kung pila gid tanan ro igu it pagbuno kara sa eawas.
Sa pahayag sa Brigada News FM Kalibo ni Police Capt. Christian John Nalangan, hepe it Malinao MPS, nagaguwa sa andang inisyal nga imbestigasyun nga naga follow-up malang kunta ro biktima sa baeayran kana it suspek nga P2,000 bilang kabayaran sa pagpabueong sa unga ni Retiro nga ginsakit it suspek.
Nasayuran nga nagsurender ro suspek kay Brgy Kagawad Vicente Rusio it Kinalangay Viejo, Malinao ag nag agto dayun sa police station para boluntaryo nga magsurender.
Samtang, sa initial assessment ni PCapt. Nalangan, posibleng murder ro igapasaka nga kaso kontra sa suspek nga si Dandy Opeñano. // ANN DESLENE SALAZAR
