Aduna nay tulo ka mga Persons of Interest (POI) ang kapulisan sa lungsod sa Dumanjug sa kamatayon sa negosyante og hayupan nga gitigbas kagahapon sa kaadlawon, Mayo 30, 2024.
Mao kini ang gitug-an ni Dumanjug Mayor Gungun Gica atol sa pakighinabi sa Brigada News FM Cebu.
Kahinumduman nga kagahapon sa kaadlawon, gitigbas-patay ang biktima nga si Leonardo “Adot” Macario duol sa iyang panimalay sa barangay Kanyuko sa Dumanjug.
Gawas sa pagpatay kaniya, giingong gidala pa sa mga mamumuno ang dili mo-menus sa P500,000 nga kwarta sa biktima nga iya untang ipamalit ug kahayupan sa Mantalungon Livestock Market sa Mantalungon Barili.
Subay niini, mimando si Mayor Gica sa bag-ong mi-asumir nga Officer- In-Charge sa Dumanjug Police Station PCpt Kelvin Roy Mamaradlo sa daling pagsulbad sa maong kremin.Una ng mitanyag si Mayor Gica ug P200,000 nga cash reward nga gikan mismo sa iyang panudlanan alang sa mga tawong makahatag og impormasyon aron madakpan ang nagpatay sa biktima.
