CAMARINES SUR – Pinusuan sa social media at hinangaan ng karamihan ang 56 anyos na lola na si Erlinda Deseo matapos na makagraduate ng senior high school sa San Jose National High School sa Partido Area.
Kuwento sa Brigada News FM Naga ng kanyang dating guro na si Renan Relloso, Head Teacher ng Technical Livelihood Education sa nasabing paaralan, nakita niya kung gaano kasinop at kadesidido si Erlinda na makapagtapos ng pag-aaral. Panahon ng pandemya noon nang muling mag-enroll ang lola kasabay ang kaniyang mga apo na nag-aaral din sa kaparehong paaralan. Lubos na humanga si Relloso dahil kahit may edad na ito, hindi pa rin siya bumibitaw sa pangarap na diploma.
Sabi pa ni Relloso, bukas ang kanilang paaralan sa pagtanggap sa mga tulad ni Nanay Erlinda na nais pang maipagpatuloy ang pag-aaral nang hindi iniisip ang edad at panahon.
Samantala, pinarangalan din si Nanay Erlinda ng special award at napag-alamang magpapatuloy pa ito ng kolehiyo sa kursong Teacher Education.
