Mihawa na si Cebu Governor Gwendolyn Garcia isip sakop sa Partido Demokratiko Pilipino-Lakas ng Bayan kon PDP-Laban.
Sa gipadalang resignation letter kang PDP-Laban President Jose Alvarez, nakita ni Garcia nga dili na maayo ang pagpasakop sa partido ni kanhi-Presidente Rodrigo Duterte.
Tungod kini sa nahimong reklamong gipasaka ni Suspended Cebu City Mayor Michael Rama ngadto sa Office of the President batok kang Garcia.
Bahin kini sa pagpahunong sa gitukod nga bus station sa Cebu Bus Rapid Transit Project atubangan sa Kapitolyo nga nakalapas sa heritage laws.
Si Rama mao ang kasamtangang bise-presidente sa PDP-Laban alang sa Visayas.
Dili usab makaantos si Garcia sa giingong pag-abusar ni Rama sa katungdanan sama na lang sa mga nahimo ngadto sa Cebu Port Authority.
Wala pa hinuon gikonsiderar sa gobernadora ang pagbalhin sa laing partido apan mas hatagan na lang niya og pagtagad ang local party nga One Cebu diin siya ang nagdumala.
Human siya nakighinabi sa mga nahibiling kauban sa PDP-Laban dinhi sa Sugbo bahin sa resignation, dili gihapon mabag-o ang iyang pagtagad ngadto kanila.
“Probably I would say 95% of the political leaders in the entire island are either a member of, or aligned with the One Cebu party. And I would continue lead this party with judiciousness, prudence and always with the goal of achieving unity.” – Gov. Gwen Garcia
Nagpasakop si Garcia sa PDP-Laban atol sa pangatungdanan ni kanhi Presidente Duterte. ///
