Walang impormasyon ang Philippine National Police sa sinabi ni dating Sen. Antonio Trillanes IV na nakipag-ugnayan ang International Criminal Court sa mga aktibong opisyal ng PNP.
Ayon kay PNP Public Information Office Chief Col. Jean Fajardo, hindi nila alam kung saan nanggaling ang impormasyon ng dating senador at wala rin silang namo-monitor kaugnay nito.
Sinabi ni Fajardo, bago magpahayag ng anumang official stand ang isang miyembro ng PNP ay dapat naipagpapaalam sa mga nakakataas na awtoridad.
Ang sinuman aniyang pulis na hindi susunod sa kanilang chain of command ay maaaring maharap sa kaukulang sanctions.
Nauna nang isiniwalat ni Trillanes na nakipag-ugnayan na umano ang ICC sa mahigit 50 opisyal ng PNP dahil sa dahil sa kaso laban kay dating Presidente Rodrigo Duterte.
