Pirma na lang ni PNP Chief Gen. Rommel Marbil ang hinihintay para sa revocation ng mga baril na pagmamay-ari ni Apollo Quiboloy.
Ito’y makaraang maglabas ng rekomendasyon ang Firearms and Explosives Office (FEO) na bawiin ang license to own and possess firearms ni Quiboloy.
Sa Kapihan sa Manila Bay, sinabi ni PNP Public Information Office Chief Col. Jean Fajardo, 19 na baril ang naka-rehistro kay Pastor Quiboloy.
Bukod kay Quiboloy, isa pa sa co-accused niya na nagmamay-ari ng isang baril ang inirekomendang bawiin din ang lisensiya.
Ipinaliwanag ni Col. Fajardo na nakasaad sa RA 10591 o Comprehensive Firearms and Ammunitions Act ang mga dahilan na pwedeng gawing basehan ng pagkansela ng LTOPF.
Nauna nang sinabi ni Gen. Marbil na kasalukuyang inaaral ng kanyang opisina ang pirmadong resolusyon ng FEO.
