LEGAZPI CITY – Liwat naman nagpagirumdom an Public Safety Office (PSO) Legazpi City mapadapit sa mga colorum na tricycle sa syudad.
Sa intrevista kan Brigada News FM Legazpi kay PSO Chief Retired Col. Rolly Esguerra, sinabi niya na madali man sanang maaraman an mga colorum na tricycle.
Iyo su boot ini an mga warang city plate number o an markings na letter L kasunod an apat na numero.
Apwera kaini, igwa nin designated na color an lunadan asin may nakasurat dapat na parada number.
Sa laog naman, dapat nakabitay an ID kan operator pati kan driver, kun wara su boot an mga ini, talagang colorum an lunadan.
Segun kay Esguerra, pag nakasakay sa colorum na tricycle asin dai piglaomang may nawalat duman, o kaya insidente nin panloloko, dipisil masusog nin huli sa kawaran nin palatandaan.
Mientrastanto, an mga colorum na tricycle, mahahampang sa impoundment, asin titicketan na may multang PHP3,000 sa first offense, PHP5,000 sa second offense asin pag dai su boot sinda nakakabayad, dai man ninda makukua an lunadan.
