LEGAZPI CITY – Sa karsel an bagsak kan sarong laborer na may kasong panlulugos ki menor de edad makalihis ining arestaron sa Purok 5, Brgy. Bacolod, banwaan kan Libon, Albay.
Binisto an akusado na si alyas “Mike”, kwarenta y syete anyos, warang agom asin residente kan Purok 6 kan kaparehong barangay.
Susog sa report kan mga otoridad, nadakop an akusado kan pinagsarong esfuerso kan Libon MPS, 1st Albay PMFC asin iba pang yunit sa kusog kan mandahamiento de aresto para sa nasambitan na kaso sa irarom kan Paragraph 1-D, Article 266-A kan Revised Penal Code na inamyendaran kan RA 8353.
Wara man ki itinalaang piyansa an korte para sa saiyang temporamenteng libertad.
Nasa kustodiya na ini kan mga otoridad para sa magkakanigong disposisyon.
