LEGAZPI CITY – Nagkondusir nin geotagging activities an Daraga Municipal Agricultural Services Office (MASO) sa manlaeng-laeng barangay kan banwaan.
Isinagibo ini sa mga omahan, gulayan, high-value crops farm partikularmente sa mga barangay kan Gapo, Tabon-Tabon, San Ramon asin Bigao.
Obheto kaining maaraman an kondisyon kan mga tanom pati na an pagsyertong dai mararaot an mga pananom asin nganing maibetaran an mga peste.
Katuyuhan man kan aktibidad na matawan nin dugang na kaaraman an mga paraoma dapit sa agrikultura nganing mas magin marhay an ani.
Mientrastanto, nagkondusir man an National Irrigation Administration (NIA) nin balidasyon sa mga posibleng irrigation area partikularmente sa Brgy. Gapo, Inarado, Alobo, Anislag, Mayon, asin Tabon-Tabon.
An mga aktibidad na ini nasa irarom kan mga programa nganing pakusugon an sektor kan agrikultura sa banwaan.
