Nag-angkon sang mga pilas sa lawas ang 3 ka persona nga sakay sang motorsiklo matapos ginbungguan sang top down nga traysikol sa national highway sang Brgy. Rosario, Pilar, Capiz.
Ginkilala ang mga napilasan nga sanday Rodrigo Lachica, 58-anyos, driver sang Smash nga motorsiklo; Veronica Vergara Vega, 65-anyos, back rider kag ang 15-anyos nga babayi nga wala na ginhingadlan lunsay mga residente sang Brgy. Cayus sa nasambit nga banwa.
Samtang ang driver sang traysikol amo si Nike Labitag, 34-anyos, isa ka mamumugon kag residente sang Brgy. Dulangan.
Sandig sa imbestigasyon sang Pilar Municipal Police Station, samtang nagasakay ang tatlo ka biktima sa motorsiklo, hinali nalang ang mga ini ginbungguan sang traysikol nga ginamaneho ni Labitag.
Bangud sa natabo, natumba ang mga biktima kag nagkalapilasan nga gilayon naman gindapatan sang pauna nga pagbulong sang Pilar MDRRMO.
Natigayon naman nga nadakpan ang suspek sa ginpatigayon nga hot pursuit operation sang mga kapulisan matapos nagpalagyo.
Sa karon, nagapabilin na ini sa kustodiya sang Pilar PNP para sa nagakaigo nga disposisyon. | Judy Ann Juare
