Pormal na nga ginlunsar sang City Government kag Gerry Roxas Foundation Inc., isa ka Mobile Water Refilling and Distribution Program nga ginpatigayon sa Barangay San Jose kag may tagline nga “Safer Water Makes Families Healthier”.
Nahibaluan nga 5 ka mga barangay sa syudad sang Roxas ang napili nga mangin una nga resipyente sang nasambit nga programa nga igadul-ong mismo sa ila barangay.
Ini amo ang Brgy. San Jose, Jumaguicjic, Liong, Cabugao kag Adlawan.
Nagtambong sa launching si Paolo Roxas nga anak ni anay DILG Secretary kag Senador Mar Roxas.
Tuman naman ang pagpasalamat ni Kapitan Albert Calipayan sa City Government kag GRF bangud suno diri, madamo sa iya kasimaryo ang nagainum gihapon sang tubig halin sa ila sinag-ob sa bubon ukon bomba bisan indi safe tungod wala man ang mga ini sang ikasarang nga magbakal sa mga refilling station.
Malipayon naman ang mga pumuluyo bangud indi na sila magmasakit kun mag-inum sang tubig kay nakaagi na sa Mobile Filtration Unit. | Judy Ann Juare
