LEGAZPI CITY – Liwat na nangangapodan an Bureau of Fire Protection (BFP) Legazpi sa publiko dapit sa mga kasulo na pwedesir mangyari orog na sa ngunyan na panahon ki El Niño.
Katakod ini kan nangyaring grass fire sa Washington Drive sa syudad kan nakalihis na Domingo, Agosto 20 kun sain kataning sana ki gasolinahan an lugar kan insidente.
Segun kay SFO3 Madonna Orendain-Rempillo, Chief Investigation and Intelligence Section PIO kan opisina, tulos na mag-apod sa pinakaharaning fire station en kaso makahiling ki mga kasulo siring kan grass fire nganing dai na maglakop pa an kalayo asin tulos na maapula.
Alangkaw kaya su boot an tyansa na magkaigwang combustion durante kan alangkaw man na heat index.
Posible kaya na igwa nin mga pasang bote sa lugar kan grass fire na iyo an pwedesir na kawsa kan kasulo.
Magigiromdoman, tulos na naapula an kalayo kan Domingo asin dai man ini nakaaepktar sa ibang kataraning orog na sa gasolinahan huli ta igwa man ini ki fire wall.
Tinawan-doon ni Rempillo na magin maingat asin alerto sa panahon ngunyan na grabe an namamateang init maski pagkabanggi.
