PADAYON nga nagaawhag ang Gensan Veterinary Office ngadto sa mga responsable nga nanag-iya sa iring ug iro nga pabakunahan ang mga binuhi kon kini ang nag-edad og tulo ka bulan pataas.
Segon ni Dr. Edward Leyson, veterinarian II sa City Veterinary Office nga dili angayan nga magduha-duha ang tag-iya sa mga mananap nga pabakunahan ang mga binuhi.
Gipaklaro pa niini nga tanang klase sa iro mahimo nilang bakunahan tungod kay walay ginapiling kaliwat ang virus.
Nasayran nga kaniadtong nakalabay nga tuig taas og kaso sa rabies ang Gensan nga mukabat sa 28 ug gikaingon nga miubos kini karon nga tuig tungod sa massive vaccination sa matag purok.
Sa bag-ong datos segon ni Dr. Leyson nga pinaagi usab sa Regional Animal Disease Diagnostic Laboratory (RDDL) anaa pa lamang sa lima nga kaso ang natala sukad Enero hangtod gahapon Agosto 17. I Danny Casi
