Arestado it mga operatiba it Malay MPS ro sangka habal-habal driver sa ginpatigayun nga drug buy-bust operation sa Sitio Cagban Ibabaw, Brgy. Manocmanoc, Boracay, Malay, Aklan.
Ro suspek hay ginkilaea nga si John Joseph Luces Castro, 26-anyos, residente it Brgy. Solido, Nabas ag temporaryong nagaistar sa isla.
Si Castro hay naboe-an it daywa ka sachet it suspected shabu nga may timbang nga 3 gramo ag may market value nga nagaabot sa P20,400.00
Nasayuran nga mabuhay eon nga eakot sa iligal nga droga ro suspek pero maila eang sa mga otoridad ag dati man nga subject sa mga operation kung siin sa monitoring it mga pulis hay maeagkuan ro transaction kara ag ro target hay ro anang mga pasahero eabi eon ro mga foreigner.
Samtang ro suspek hay posibleng magpangatubang sa kasong pag eabag sa R.A. 9165 o Comprehensive Dangerous Drug Act of 2002. // ANN DESLENE SALAZAR
