Malipayon ang mga katapo sang Mambusao Municipal Police Station matapos ginkilala ang ila istasyon bilang Best Performing Police Station for the week kag nakakuha sang mataas nga porsyento sa operational accomplishment nga nakahatag sang dako nga contribution sa over-all performance sang Capiz Police Provincial Office.
Ang nasambit nga pasidungog ang personal nga ginbaton ni PCpt Alladen B Talaban, Officer in Charge sang Mambusao MPS sa ginhiwat nga Flag raising kag Awarding Ceremony sa Camp Teodorico C Apil, Brgy. Lanot, Roxas City sadtong tinalikdan nga Hulyo 24, 2023.
Sa interview sang Brigada News FM Roxas City kay PCpt Talaban, iya ginpayahag nga weekly ini nga ginconduct sang CPPO sa pagpamuno man ni PCol. Jerome D Afuyog, Jr., Police Director sang probinsya.
Suno kay Talaban, nakuha nila ang amo nga pasidungog sa amo nga week bangud madinalag-on nila nga naaresto ang duha ka wanted person kag maayo man ang ila police visibility sa ila banwa, wala sang crime incident nga nagakatabo kag padayon ang ila pagpatuman sang mga programa para sa mga pumuluyo.
Ginpahayag man sini nga ang ila nabaton nga pasidungog kag pagkilala ang magaserbi nga motivation kag ila pa gid mapadayon ang maayo nga pagserbisyo sa mga Mambusaonon. | Judy Ann Juare
