LEGAZPI CITY – Gadan an sarong miyembro kan Philippine Coast Guard makalihis na makabangga an piglulunadang motorsiklo sa kudal ki sarong harong sa Purok 3, Brgy. San Joaquin, syudad kan Legazpi kasobanggi, Hunyo 9.
Segun sa impormasyon, binisto an biktima na si CG ASN Kurt Russel Incognito na iyo man an driver kan Honda PCX.
Lugadan man an tulo pang backride kaini na sinda Emman Sidayao Sindac, Carl Astor asin Joshua Pagadora Mirabueno na mga residente kan Pag-asa, Rawis kan kaparehong syudad.
Nagluwas sa inisyal na imbestigasyon kan Legazpi CPS, haleng Brgy. Tamaoyan an behikulo paduman sa Pag-asa, alagad nag-overshoot ini sa parte kan lugar kan insidente hasta sa buminangga sa kudal kan Alejo’s Residence.
Tulos na dinara an mga ini sa BRHMC alagad ipigdeklarar an biktima na dead on arrival kan attending physician, mantang nagsapar man ki lugad an tulo pa kaining mga kairiba.
Sa ngunyan, nasa kustodiya na kan nasambit na hepatura an behikulo para sa magkakanigong disposisyon.
