CEBU CITY –Naggahin ang Department of Agriculture sa Central Visayas (DA-7) ug P293 milyones aron matubag ang epekto sa El Niño weather phenomenon.
Sa maong kantidad, kapin sa P255 milyones ang gastohon aron ma-optimize ang produksiyon sa mga pananom, kahayupan ug pangisda sa mga dapit nga non-threatened ug sa pagluwas sa mga dapit nga grabeng maapektuhan sa ting-init pinaagi sa pagpadala ug tubig.
Samtang ang Cebu City Agriculture Department (CAD) naggahin usab ug budget nga P80 milyones alang sa pagpangandam sa El Niño.
Kahinumduman nga niadtong Hulyo 4, gideklarar sa Philippine Atmospheric, Geophysical and Astronomical Services Administration (Pagasa) ang pagsugod sa El Niño phenomenon sa nasud ug posibling magpadayon kini hangtod sa unang quarter sa 2024.
Ang DA-7 “El Niño Action Plan” adunay proposed budget nga P293 milyon, diin gipundohan kini pinaagi sa General Appropriation Acts of 2023.//
