GIMANDOAN na sa Department of Interior and Local Government kun DILG 12 ang mga kapitan sa 26 ka barangay sa GenSan sa pag-activate na sa ilang Emergency Operations Center and Disaster Monitoring and Reporting System tungod sa bagyong ‘Dante’.
Sa memorandum nga gipagula sa DILG-12 gimanduan usab ang mga kapitan nga magbantay ug mo-report sa nasinatiang weather disturbance. Partikular gipabantayan sa DILG-12 ngadto sa mga opisyal sa barangay ang High Risk Areas aron gilayong makahimo og pre-emptive evacuation kung kinahanglan.
Ugaling dunay mobakwit, kinahanglan usab nga masiguro sa mga opisyal nga masunod ang health protocols sa mga evacuation centers.
Sama sa social distancing, disinfection ug magpakatag og health personnel aron malikayan ang posibleng takdanay.
Kahibaloan nakalabay’ng semana, pipila kabalayan sa GenSan ang gisulod og tubig baha tungod sa kusog nga pag-ulan. (Richel Gubalani)
