KALIBO, AKLAN—Na-infect sa pantry it andang opisina do limang empleyado it Office of the Municipal Mayor sa banwa it Kalibo nga nagpositibo sa COVID-19.
Suno kay Kalibo mayor Emerson Lachica, do nasambit nga mga empleyado hay dueongan nga nagakaon ag may close contact sa nauna eon nga nagpositibo sa deadly virus.
Raya man do naging rasun kung ham-an it temporaryo nga ginpasara do andang taeatapan agud nga taw-an it daean do disinfection ag contact tracing.
Mag-eowas sa taeatapan it alkalde, sarado man do Municipal Planning and Development Office ag do Human Resource and Management Office matapos may tig-sambilog nga empleyado do natapna it sakit.
Nasayuran nga do Kalibo hay may una nga 701 total cases kung siin 75 pa kara do aktibong kaso samtang 23 man do binawian it kabuhi. // SHERRY ANNE REUNIR-VIDAL
