Nanindigan ang Senate Minority bloc na hindi sila pabor sa naging rekumendasyon at committee report ng Senate Blue Ribbon Committee hinggil sa imbestigasyon nito sa sugar fiasco.
Ngayong hapon, inihain nina Senate Minority Leader Koko Pimentel at Deputy Minority Leader Risa Hontiveros ang sarili nilang report at rekumendasyon.
Sa ilalim nito, sinabi ng dalawang Senador na hindi ‘entirely blameless’ si Executive Secretary Vic Rodriguez sa pagi-isyu ng Sugar Order No. 4.
Sa orihinal na panel report kasi ng Blue Ribbon, pinakakasuhan ang apat na mga opisyal ng Agriculture at Sugar Regulatory Administration – pero lusot si Rodriguez.
Ayon sa Minority Bloc, malinaw na mayroon pang mga isyu na hindi na-address sa pagdinig.
Hindi na rin umano makatarungan pang pagdiskitahan sina Agriculture Usec. Leocadio Sebastian, resigned Sugar Regulatory Administration chief Hermegenildo Serafica, at mga dating Sugar Board members Roland Beltran at Aurelio Gerardo Valderrama Jr.
Muli ring hiniling na kinakailangan nang magtalaga ng opisyal na Agriculture Secretary.
#
