POSITIBO sa Covid-19 ang siyam ka pulis sa Sarangani Police Provincial Office (SPPO). Matud ni PCapt. Robert Pores, tigpamaba sa SPPO kini ang bag-ong aktibong kaso sa virus sa SPPO.
Naa usab sa 28 ka personahe nila ang na-contact trace sa siyam ka nagpositibo ug kasamtangang naka-quarantine. Gipailawom ang 28 ka pulis sa RT-PCR test atong Lunes ug kasamtangan nilang ginahulat ang resulta niini. Sagad sa mga nagpositibo ang naa sa mga border checkpoints hinungdan nga taas ang tyansa nga makaangkon sa virus.
Apan sagad sa nagpositibo ang asymptomatic ug mga nabakunahan na batok sa nahisgotang virus. Sa SPPO naa na lang sa halos 3% sa ilang personahe ang wala pa nabakunahan batok Covid-19.
Sa ulahing datus sa Police Regional Office (PRO) 12 nabakunahan na kontra sa virus ang 90.9% sa 7,944 personahe sa regional office. ( Richel Gubalani)
