Dead-on-arrival ro sangka unga nga eaeaki matapos raya nga bun-on it anang kaugalingon nga ama sa Brgy. Bubog, Numancia, Aklan.
Sa interview it Brigada News FM Kalibo kay Police Staff Sgt. Felizardo Navarra Jr., imbestigador it Numancia MPS, sa andang pag imbestiga, ginsueang it 30yo nga suspek ro biktima sa baeay it lola kara sa Brgy. Laguinbanua East sa nasambit nga banwa ag dinaea sa andang ancestral house.
Pag abot segun sa baeay hay dinaea nana ro unga sa kwarto kung siin, pati ro igmanghud segun it suspek hay ginhana pa kara nga bun-on pero nakalikaw ag nakapangayo it bulig sa andang mga kaeapitbaeay.
Sa pagbalik it manghud it suspek sa baeay hay ginhambae segun it suspek nga pinatay nana ro anang 6yo nga unga nga eaeaki.
Gin-itsa pa segun it suspek ro kutsilyo ag sanduko.
Insigida segun sanda nga nagsueod sa baeay ag dikara nanda nakita nga duguan ro unga nga biktima ag dinaea sa sangka pribadong ospital pero binawian eon raya it kabuhi.
May nina man sa eawas ro suspek nga posibleng naghana nga magpakamatay matapos ro kremin.
Sa pag-imbestiga, may away ro suspek ag ina it biktima nga sangka government employee.
Arestado it Numancia MPS ro suspek nga ginpaidaeum sa medical examination samtang ginahueat pa ro ina it unga sa magiging desisyon kara kung pagapasakaan it kaso ro suspek.
Igapaidaeum man ro eawas it biktima sa post mortem examination. / ANN DESLENE SALAZAR
