Nikabat sa 697 ka mga panimalay ang natala sa buhatan sa DWUP kun Division for the Welfare of the Urban Poor ang naka-avail sa ‘Let There Be Light’ nga usa ka programa sa Kagamhanan sa Dakbayan sa Sugbo gikan sa buwan sa Enero hangtod Abril sa kasamtangang tuig.
Matud sa DWUP nga daghang mga panimalay ang mo-aplay alang sa low-cost electrification program sa Kagamhanan sa umaabot nga mga buwan.
Gibutyag sab ni Mark Lester Ceballos, kinsa mao ang executive director sa DWUP, nga plano sab niya nga susihon ang mga kwalipikasyon ug rekisitos sa programa aron matabangan ang mga kabus nga pamilya nga makabaton og kaugalingong koneksyon sa kuryente human mawad-an sa ilang mga panimalay tungod sa mga kalamidad nga niagi.
Gawas sa pag-reblock sa mga lugar nga nasunogan sa dakbayan, ang DWUP nitabang sab sa mga apektadong pamilya pinaagi sa pagpasayon sa ilang electrical reconnections pinaagi sa “Let There Be Light” program.
Midugang sab si Ceballos nga iya sab nga gipakatap ang iyang mga kawani sa mga lugar nga naigo sa sunog aron makatabang sa mga residente sa pagpadali sa ilang mga aplikasyon sa programa.
ingon man nga ang iyang buhatan nagtabang sab sa mga informal settlers sa pagpabalik sa ilang suplay sa kuryente.
Ang mga interesadong aplikante mahimong mobisita sa buhatan sa DWUP sa unang andana sa Cebu City Satellite Office atbang lang sa Cebu City Hall///
