LEGAZPI CITY – Nakatalaan nang idistribwer kan City Local Government kan Ligao sa 55 mga barangay an emergency transport vehicle ngunyan na bulan nin Nobyembre.
Segun kay Mayor Fernando Gonzalez, tatawan an kada barangay nin tigsararong L300 van.
Sa oras na magin klarado an pig-aayos na dokumento siring kan COA clearance, tulos man ining ipapanao sa mga barangay.
Kadaklan kaya su boot sa mga far flung barangays, limitado an mga lunadan kaya padipisilan an paglunad pasiring sa banwa o sa syudad.
An nasambit na behikulo, pwedesir gamiton kan mga senior citizen, PWDs, barangay officials, solid waste personnels asin kadakol pang iba para sa mga emerhensya.
Segun pa sa alkalde, dae ini pwedesir gamiton para sa pansadiring mga lakaw.
