Giabiabi ni Gobernador Henry Oaminal ang mga rebel returnees nga nakahukom nga mobalik sa gobyerno ug mipili sa pagpuyo nga malinawon sa komunidad.
Diin ang Misamis Occidental Provincial Government nihatag ug mokabat sa P500,000 nga cash assistance sa mga misurender nga rebelde, nga mismong si Gov.Oaminal ang mitunol sa maong hinabang pinansyal alang sa mga rebel returnees nga gidawat sa usa ka “alyas Cesar.”
Kini gisaksihan ni 1st Infantry Tabak Division Commander MGen. Antonio Nafarrete, 10th Infantry Battalion Commanding Officer Jose Andre Monje ug 102nd Infantry Brigade Commander Col. Elmer Scudero.
Sumala pa sa opisyal nga ang pagbalik ni Cesar sa komunidad maoy laing kadaugan dinhi sa Misamis Occidental sa peace and order initiatives, subay sa provincial thrust sa 5Ms.
Diin ang ‘5Ms’ o ‘Misamisnon Magpuyong Malinawon, Malambuon ug Malipayon’ (Misamisnon Live Peaceful, Prosperous and Happy) maoy usa sa mga flagship initiatives sa probinsya lakip na ang tinguha nga matapos na ang problema sa insurhensya ug panagbangi sa Misamis Occidental.-END
